شماعة الحب والجواز

الوقت الاخير بدأت احس ان الحب ده مجرد شماعة بنعلق عليها رغباتنا واحتياجتنا اللى مش بنعرف نتكلم عنها فبنختار اننا نقول حب علشان نحط الرغبات فى اطار مشروع محدش يلومه

والجواز مجرد شكل اجتماعى من اشكال اشباع الرغبات المكبوتة جوانا سواء كنا كابتينها علشان المجتمع او علشان صورتنا الذاتية قدام نفسنا

الاحتياجات دى ببساطة بتتمثل فى الجنس والقبول والسيطرة فى بعض الاحيان والتواكل على غيرنا علشان يقوم بحاجات كنا بنعرف كويس نعملها

الانسان الطبيعى من وجهة نظرى بيكون أقوى قبل ما يخترع كلمة حب فى قاموسه الشخصى لانه مش بيكون عنده حاجة يبكى عليها ومعندوش حاجة اتعود عليها او حد اتعود عليه

بنختار بارادتنا نحب علشان بنكون شايفين مجرد القصص الافلاطونية عن التضحية وانكار الذات والرغبة فى اسعاد الاخر لكن بنقع على جدور رقبتنا ونتخبط فى اقرب حيط من الانانية وحب السيطرة والرغبة فى اثبات وجودنا وده نابع من ان بيكون فى طرف من الاتنين او هما الاتنين مش بيشجعوا طموح واحلام بعض بيكون الشعار انا ثم انا ثم انا ولو زاد وقت نبقى نبص عليك

لما نيجى نشوف عهد الزواج والالتزام بنلاقى انها مجرد ورقة اخدوها الاتنين علشان يبقى اشباع رغباتهم حاجة مشروعة قدام الناس وميحسوش بالذنب فى الوقت اللى مفكروش فيه ولا لحظة يعنى ايه التزام وعهد كل اللى كانوا شايفينه مجرد واجهة اجتماعية واللى من وجهة نظرى من غير قناعتهم بعهودها والتزامها مالهاش اى تلاتين لزمة

يعنى مثلا تلاقى بيتعهدوا بوجودهم جنب بعض فى الصحة والمرض وتتفاجئ انها لو طلعلها دمل فى وشها بيوديها بيت اهلها لانه معندوش وقت ياخد باله من دملها

تلاقيهم بيقولوا فى السراء والضراء ولما تطلب منه حاجة وميكونش يقدر يجيبهالها تقولله دانا فى بيت بابا كنت أأمر وهما يجيبوا (وهى اصلا كانت بتاخد بالشبشب)

تلاقى بيقولوا الى ان يفرقنا الموت وهما ببساطة فرقتهم وسائل السوشيال ميديا وهى شقطله واحدة من على الفيس ولا اى منتدى وهى شقطها واحد من الواتس وهما الاتنين عايشين حياتين تانى خالص بيخونوا بعض الكترونيا

الازمات دى وغير مش ازمة الحب والجواز

لا دى ازمة التزام

معنى انك تلتزم يحاجة هو انك تتعب فيها قوى وتعمل مجهود جبار علشان تنجح زى ما بتقضى 12 ساعة فى شغلك علشان تجيب مم بحجة ( ان كل ده لمين ماهو ليكم ) قضى ساعتين تحايلها وتحبها وتسمعلها حتى لو كان رغيها فاضى

زى ما بتمسكى التليفون ترغى فيه لحد ما دقايقك ودقايق اصحابك تخلص امسكى فيه هو وقدرية واحترميه وحاولى تسمعيه وتفهمى الامور من واجهة نظره

بلاش نقول كلام كبير احنا مش قده

لو هتحب وناوى تتجوز يبقى اتعب والتزم

لكن لو هتلعب فده هيخليك انت اضعف وهى اضعف من الاول لان اللى مقدرش يبذل مجهود الالتزام بالاخر مستحيل يقدر يبذل مجهود فى انه يلملم شتات نفسه ....

By / grace group